Cairo (RH)-Ilo-wareedyo xog-ogaal u ah xiriirka Masar iyo Soomaaliya ayaa u sheegay wargeyska Al-Carabi Al-Jadiid in ay soo ifbaxayso xiisad aan la shaacin oo u dhexeysa Qaahira iyo Muqdisho. Xiisaddan ayaa salka ku haysa hakad ku yimid fulinta heshiiskii iskaashiga milatari ee labada dal ay kala saxiixdeen bishii Agoosto 2024.
Haddaba, waxaan halkan ku soo koobayaa nuxurka warbixinta Al-Carabi Al-Jadiid:
Maxay tahay sababta dhabta ah ee khilaafka? Isbeddelka siyaasadda Muqdisho
Sababta ugu weyn ee xiisadda kicisay waa isbeddelka jihada siyaasadda arrimaha dibadda ee Soomaaliya, gaar ahaan isu soo dhawaanshaha degdegga ah ee ay la yeelatay Itoobiya, kadib khilaaf soo kala dhexgalay labada dal.
Tallaabadan ayaa u muuqata mid gebi ahaanba liddi ku ah isfaham istiraatiiji ah oo hore uga dhex jiray Soomaaliya iyo Masar.
Qaahira waxay u aragtaa in Madaxweyne Xasan Sheekh Maxamuud — oo bilo ka hor muujinayay shuraako dhow oo Masar kala shaqeeya khataraha gobolka, sida fiditaanka Itoobiya iyo arrinta biyo-xireenka Nile — uu hadda qaaday "tallaabo kala wareeg 180-digrii" oo lama filaan ah. Saamaynta khilaafka
Masar ayaa la sheegay inay gebi ahaanba hakisay fulinta heshiis iskaashi milatari oo ballaaran oo labada dal kala saxiixdeen bishii Agoosto 2024.
Qorshaha la hakiyay waxaa ku jiray in Masar ay Soomaaliya u soo dirto in ka badan 1,000 askari oo ka tirsan ciidamadeeda gaarka ah, si ay uga qayb qaataan dagaalka Al-Shabaab.
Sida ay ilo-wareedyadu sheegeen, qorshahan hadda waa mid "ficil ahaan la qaboojiyay" sababo la xiriira kalsooni-darrada Masar ka qabto hoggaanka Soomaaliya. Dareenka iyo aragtida Masar
Go'aan-gaareyaasha Qaahira waxay dareemayaan "niyad jab aad u weyn" iyo "naxdin siyaasadeed" oo ka dhalatay isbeddelkan lama filaanka ah ee Soomaaliya ay u jeesatay dhanka Itoobiya.
Masaaridu uma arkaan Madaxweyne Xasan Sheekh "shuraako lagu kalsoonaan karo" waqtigan la joogo.
Isbeddelkan ayaa halis gelinaya, sida uu mid ka mid ah ilo-wareedyadu sheegay, "ra’sumaal istiraatiiji ah oo ay Masar wax badan ku bixisay sannadihii la soo dhaafay, ha ahaato dhanka taageerada milatariga, tayeynta diblomaasiyadeed, ama horumarinta amniga ee kaadirka Soomaalida."
Xaaladda waxaa sii murjinaya faragelinta iyo danaha iska hor imanaya ee quwadaha gobolka.
Imaatinka ciidamo Turkish ah oo dhawaan soo gaaray Muqdisho ayaa weji kale ku soo kordhiyay xaaladda. Sidoo kale, dalka Eritrea ayaa la sheegay inuu walaac ka muujiyay isu soo dhawaanshaha Soomaaliya iyo Itoobiya, isagoo ku tilmaamay tallaabooyin degdeg ah oo aan laga fiirsan.
W/Q:Axmed Cali Sheekh
Saxafi madax bannaan